El mga personajes del Philippine National Police-Maritime Group (PNP-MG) ya aresta un persona y ya confisca mga smuggled cigarillo na provincia del Zamboanga del Norte, asegun con el policia del Viernes.
El Zamboanga del Norte Maritime Police Station nohay mas nombra con el arestao persona, con quien ya aresta del Miercoles na Barangay Sicayab-Bucana, ciudad de Dapitan.
Asegun con el policia, ya confisca na posesion del arestao persona total de 76 reams de diferentes clase de cigarillo que tiene el valor de P73,320.
Asegun con el policia, el confiscacion del mga smuggled cigarillo ya vene despues que ya recivi informacion el mga pulis sobre el llegada del mga contrabando na Barangay Sicayab-Bucana, un barrio costero.
El policia ta prepara ya el mga necesario documentos para planta caso contra con el arestao persona por violacion del Ley de Republic Numero 10863 y 10643. (B. Garcia)