El Philippine Army ya inicia cambio na liderato del 6th Infantry Division (6ID) base na Campo Siongco provincia de Maguindanao del Norte, asegun con el militar del Miercoles.
El ceremonia del cambio del mando ya conduci del Martes na Campo Siongco na Barangay Awang, Datu Odin Sinsuat, Maguindanao del Norte, y ya encabesa si Tiniente General Roy Galido, el comandante del Philippine Army.
Si Galido ya instola con Major General Antonio Nafarrete como el interino comandante del 6ID.
Asegun con el 6ID, si Nafarrete ya releva con Major General Alex Rillera, quien ya servi como el aka-41 y ya servi dentro de un año y serca seis meses como el comandante del 6ID.
Asegun con el 6ID, el ceremonia del cambio ya significa tamen como el fin del 38 años servicio de Rillera na servicio militar.
Si Rillera ya extende su gratitud con el fuerza armada del Filipinas, particularmente con el Philippine Army, por el confianza y confidencia ya dale conele.
Bajo na liderato de Rillera, el 6ID ya acomplici significante mision neutralizando amenaso y asegurando seguridad regional y estabilidad.
Desde año 2023 para amediante del año 2024, el 6ID exitosamente ya neutaliza 689 miembros de varias grupos de amensao, incluido objetivo de alto valor dentro del grupo comunista y terorista local.
El mga operaciones que ya conduci el 6ID ya resulta na capturada, confiscacion, rendida, y recubrida del 737 materiales de guerra, incluido varias tipos de arsenal y 262 dispositivo explosivo.
Mientras tanto, si Nafarrete tiene mucho experiencia para servi na su nuevo designacion.
Si Nafarrete ya servi antes como el comandante del 1st Infantry Division y como el diputado comandante para el defensa interno del Western Mindanao Command (Westmincom).
Si Galido ya expresa su gratitud con Rillera por su exemplario liderato del 6ID and su esfuerzo implacable para mantene el paz y orden na centro y sur-centro del Mindanao. (B. Garcia)