El mga personajes del Joint Task Force (JTF)-Poseidon ya esta bajo’l cuatro-dia “Tabletop Exercise and Contingency Planning Workshop” en preparacion para el ejercisio electoral na 2025.
Asegun con el 4th Civil Relations Group (4CRG) del Domingo, con el entreno ya facilita el mga oficiales desde quartel del Western Mindanao Command (Westmincom).
Asegun con el 4CRG, el cuatro-dia entreno que ya culmina del Sabado, ya conduci na quartel del 2nd Marine Brigade (2MBde) con Brigadier General Nestor Narag, Jr. como el juesped de honor.
Na su mensaje, ya empatiza si Narag el importancia de preparacion y colaboracion entre el miembros del fuersa armada para mantene paz y seguridad durante el periodo de eleccion.
Si Narag ya alaba con el mga participantes del entreno por el de ila dedicacion y completo preparacion, descatando cay el de ila esfuezos es crucial na salvaguardando del proceso de democracia na seleccion de legitimo oficiales nacional y local.
El entreno ya inclui sesiones de planificacion estrategico, concentrando na varias desafios potencial y amenaso que hay socede durante el periodo de eleccion. (B. Garcia)