Exitosamente ya aresta el mga autoridad ya desmantela un cuarto de droga ilegal y ya aresta con el mantendedor y cinco patrocinadores na un operacion contra droga na provincia del Basilan, asegun con un oficial del Domingo.
Si Gil Cesario Castro, el director del Philippine Drug Enforcement Agency na Bangsamoro Autonomous Region in Muslim Mindanao (PDEA-BARMM), ya identified con el mga arestao como canda alias Popoy, 34 años el edad y al mantenedor de cuarto de droga; y de suyu mga patrocinadores como canda alias Dodong, 45, alias Janjan, 40, alias Wi, 28; alias Mar, 35; alias Vincent, 25.
Asegun con Castro, con el mga suspechao ya aresta na un operacion de compra busto que ya resulta na desmantelada del cuarto de droga del Viernes na Purok Digong, Barangay Malinis, ciudad de Lamitan, provincia del Basilan.
Asegun con Castro, ya confisca desde’l desmantelao cuarto de droga mas o menos 12 gramos de suspechao shabu enpaquetao na 22 termosellada transparente sobrecitos plastico que tiene el valor de P81,600, seis celpons, dinero de compra busto, varias parafernales de droga, y diferentes clase de tarjetas de identificacion.
Asegun con Castro, ya detene con el mga arestao suspechao en preparacion para el plantada del caso contra canila por violacion del Ley Integral de Drogas Peligrosas de 2002.
Si Castro ya reafirma el dedicacion del agencia na mantencion de paz y orden, recordando con el publico cay cada triunfo contra droga ilegal es un paso para na buen y mas segurao futuro del mga Basileños. (B. Garcia)