El rapido respondida del mga personajes del Guardia Costera del Filipinas o PCG ya evita el un potencial disastre cuando exitosamente sila ya salva con todo’l 19 tripulantes del un barco de pasajero y carga que ya encalla na mar del Rio Hondo, ciudad de Zamboanga, del Viernes.
El barco ya encalla despues que ya rimpuja con este el grande mareada y fuerte viento por causa del mal tiempo.
Asegun con el PAGASA, el mal tiempo ya causa el habagat que ta experiencia na diferente parte del Zamboanga Peninsula y Mindanao.
Despues que ya recivi llamada de anguista, enseguidas ya organiza el PCG un especial grupo para ausilla con el mga tripulantes del barco.
Asegun con el Coast Guard District Southwestern Mindanao (CGDSWM) el especial grupo exitosamente ya puede salva contodo’l 19 tripulantes.
Asegun con el CGDSWM del Domingo, el de ila grupo ta esta vigilante na chequiada del mga lugar para cual quier impacto de medio ambiente y ya conseja con mga capitan de varco para toma precaucion.
Mientras ta continua chequia con el situacion, el PCG ta asegura tamen con el publico cay ta hace sila todo’l necesario medidas para guardia con el mar y asegura con el bienestar del comunidad maritima. (B. Garcia)