a aresta mga otoridad con dos “High-Value Individuals” suspechao y ya confisca valor de P680,000 suspechao shabu na un campanya contra droga ilegal aqui na ciudad de Zamboanga.
Si Police Major Benzar Bairulla, el hefe del Zamboanga City Police Station 6 (ZCPS6), ya nombra con el dos aresta HVIs suspechao como canda Al-nadzmer Jalaidi alias Uttoh y su hermano, si Al-nadzre, alias Nadz, ambos mga residentes de Carmina Drive, Barangay Mampang, este ciudad.
Asegun con Bairulla con el dos man hermano ya aresta na un “buy-bust operation” el combinao operativas del Philippine Drug Enforcement Agency (PDEA) y del ZCPS6 mga alas 4:45 del tarde del Lunes na Sitio Daap, Barangay Sangali, este ciudad.
Si Bairulla ya habla cay el mga operativas del PDEA y pulis ya puede confisca na posesion del mga suspechao 100 gramos de suspechao shabu enpaketao na dos pakete de plastic con el valor de P680,000, un bandel de “boodle money” que ya pone insima un verdadero P1,000 como markao sen, un motorsiclo, y un bag.
Con el man hermano suspechao ya pone bajo’l custodiya del PDEA para el plantada del formal asunto encontra canila. (B. Garcia) (Photo courtesy of PDEA-9)