El gobierno local del municipio de R.T. Lim na Zamboanga Sibugay ya inagura del Jueves con el P4 millones valor de proyecto de camino adoptando con el proceso del programa del Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS).
El Kalahi-CIDSS es uno del programas de alivio de pobreza del gobierno nacional que ta implementa el Departamento de Bienestar Social y Desarollo, o DSWD.
Asegun con el DSWD-Zamboanga Peninsula, el proyecto de camino ta servi como un acceso desde calle Yakal para Marang ng Barangay Mabini, R.T. Lim, Zamboanga Sibugay.
El proyecto, que tiene el largor de 306 metros lineal, ya costa P4,479,402.84 y ya hace dentro de 74 dias calendario.
Asegun con el DSWD, el gobierno municipal del R.T. Lim amo el ya gasta para el construccion del proyecto, categorizao como un iniciativa de subvencion cero.
El DSWD ya habla, por adheriendo con el procesos del programa de Kalahi-CIDSS, el unidad de gobierno local ya demostra significante mejoramiento na implementacion de proyecto para promova el desarollo na cada barrio.
Asegun con el DSWD, este aprocha ta destaca el valores de transparencia, participacion, y responsibilidad, asegurando un positivo efecto na comunidad. (B. Garcia)Â