El mga autoridad ya confisca P1.8 millones valor de droga ilegal cuando ya aresta sila un persona mas buscada na un operacion de aplicacion de ley na Bangsamoro Autonomous Region in Muslim Mindanao (BARMM), asegun con el policia del Lunes.
El Police Regional Office-Bangsamoro Autonomous Region (PRO-BAR) ya identifica con el arestao persona mas buscada como si Abo Kaunotan, 42 años el edad.
Asegun con el PRO-BAR, con Kaunotan ya aresta na un operacion de aplicacion de ley por medio na implementacion de un orden de aresto del otro Miercoles na calle de Datu Piang, Barangay Poblacion 7, ciudad de Cotabato.
Asegun con el PRO-BAR, si Kaunotan tiene pendiente orden de aresto sin recomendao piansa por el crimen de matansa que ya dale el un corte na ciudad de Cotabato.
El PRO-BAR ya habla, ya confisca na posesion de Kaunotan durante su aresto 270 gramos de suspechao shabu que tiene el valor de P1.8 millones, P10,000 dinero, 20 bala de calibre .40 pusil, dos acerao clip de un pistola, un motorciclo, dos celpons, un digital pesador, y un bolso bandolera.
Asegun con el policia, con el suspechao ya pone bajo’l custodia del Criminal Investigation and Detection Group (CIDG) para el documentacion y mas del procedimiento legal.
“Dejas que servi este como un mensaje fuerte con mga inidividuales envuelto na actividades ilegal—el de aton autoridades ta esta inquebrantable para busca el justicia y asegurando el seguridad del mga gente del BARMM,” ya habla si Police Brigadier General Romeo Macapaz, el director del PRO-BAR.
Si Macapaz ya apela con el publico para continua suporta con el de ila esfuerzos por medio de proporcionar informacion que puede ayuda na de ila mision para previni crimen y defende con el estado de derecho. (B. Garcia)