Zamboanga: Otro 2 HVT persona arestao, mas de P1 millon shabu ya confisca

0
6
photo courtesy of PDEA-BARMM

Otro dos high-value targets (HVTs) el ya aresta y mas de P1 millon valor de droga ilegal el ya confisca el mga autoridad na Bangsamoro Autonomous Region in Muslim Mindanao (BARMM), asegun con el Philippine Drug Enforcement Agency (PDEA) del Viernes.

Si Gil Cesario Castro, el PDEA-BARMM director, ya identifica con el dos arestao HVT suspechao como canda Soraida Dumagay Mato, conocido tamen como si Madam, 32 años el edad, y el de suyu uban si M’to Akon Mamatas, 47, ambos mga residentes del Barangay Litayen, Parang, Maguindanao del Norte.

Asegun con Castro, con el dos HVT suspechao ya aresta na un operacion de compra busto na un hotel na calle Don Rufino Alonzo na Barangay Poblacion 5, ciudad de Cotabato del Miercoles.

Si Castro ya habla, ya confisca na posesion del dos arestao suspechao 160 gramos de shabu enpaquetao na siete temosellada transparente sobrecitos plastico que tiene el valor de P1,088,000, dinero de compra busto, un bolsa de cuero, dos celpon, y diferentes tarjetas de identificacion.

Asegun con Castro, con el dos arestao HVT suspechao temporariamente ya detene na carcel del PDEA-BARMM en preparacion para el plantada del asunto contra canila por violacion del Comprehensive Dangerous Drugs Act of 2002.

Si Castro ya habla, con el compra busto ya conduci el mga agentes del PDEA con el suporta del mga operativas de policia na region autonomo.

El aresto del dos HVT suspechao ya vene un dia despues mga autoridad ya aresta un HVT persona y ya confisca valor de P3.4 millon droga ilegal na provincia del Lanao del Sur.

Ya aresta del Martes con Arham Hadji Omar Alim, quien conocido tamen como si Abol, 25 años el edad y residente del Barangay Dilusan, Maguing, Lanao del Sur.

Con Alim ya aresta na un operacion de compra busto na Barangay Marawi Poblacion, ciudad de Marawi, Lanao del Sur. (B. Garcia)

Leave a Reply