El combinao elementos del militar y pulisiya ya areasta con cuatro rebelde New People’s Army (NPA) na un “law enforcement operation” na Sitio Bagang-Bagang, Barangay Lagubang, Senator Ninoy Aquino (SNA), Sultan Kudarat del Miyercoles.
Si Major General Alex Rillera, el comandante del Joint Task Force Central, ya nombra con el mga arestao rebelde NPA como canda Hali Watamama Agsem alias Tracky; Antes Ugis Agsem alias Kulalong; Pengi Landigan Agsem alias Bayot; y si Henry Ugis Agsem alias Dexter.
Asegun con Rillera cay el cuatro rebelde NPA amo mga restante myembros del “Sub-Regional Committee Daguma, Far South Mindanao Region”.
Asegun con Rillera cay el cuatro rebelde NPA envuelto na matansa de Richard Caligid Panganuron na Sitio Bagang-Bagang del Marso 17, 2022; matansa de Nonoy Kalay Lapi un CAFGU na Sitio Lemangga, Barangay Midtungok del Octubre 16, 2022; matansa de Egme Salaman Watamama del Marso 17, 2021, na Sitio Binibol, Barangay Lagubang; y matansa de Sargento Ariel Entang del 7th Infantry Battalion during un tirahan del Hunyo 16, 2022, na Barangay Napnapon, Palimbang.
Si Rillera ya habla cay el cuatro arestao rebelde NPA tiene pendiente orden de aresto por el crimen de matansa, “attempted homicide”, y violacion del Republic Act 9165 or mas conosido como el Comprehensive Dangerous Drugs Act of 2002.
Con el cuatro arestao rebelde NPA ya pone bajo el custodiya del Criminal Investigation and Detection Group na Rehyon 12. (B. Garcia, photo courtesy of Joint Task Force-Central)