Dos personas mas buscada na provincia del Zamboanga Sibugay el ya aresta mga autoridad na un operacion de aplicacion de ley, asegun con el policia del Viernes.
El mando regional del policia o Police Regional Office-9 (PRO-9), ya identifica con el dos arestao acusao como canda Jesson Monares Barquin, y Junnel Maglangit Barquin, listao como el numero ocho y nueve personas mas buscada na provincia del Zamboanga Sibugay, respectivamente.
Asegun con el policia, con el dos personas mas buscada ya aresta na un operacion de aplicacion de ley por medio de implementacion de orden de aresto mga alas 8:20 del Miercoles aga na Purok Bagong Silang, Barangay Sanito, Ipil, Zamboanga Sibugay.
Asegun con el policia, el dos personas mas buscada tiene pendiente orden de aresto por el crimen de frustrada matansa con recomendao piansa de P200,000 cada uno que ya dale el un corte na Ipil, Zamboanga Sibugay del Julio 9, 2024.
Asegun con el policia, con el dos arestao personas mas buscada ya pone bajo’l custodia del Criminal Investigation and Detection Group na Zamboanga Zamboanga para el documentacion y propio disposicion. (B. Garcia)