El militar ya designa nuevo hefe del oficina del Assistant Chief of Unified Command Staff for Civil-Military Operations (ACUCS para CMO) del Western Mindanao Command (Westmincom).
El nuevo hefe del ACUCS para CMO amo si Coronel Rey Pasco, quien ya asumi na puesto durante un ceremonia de cambio de oficina del otro semana.
Si Pasco ya releva con Coronel Wendell Basat, con quien ya designa na otro posicion na quartel del Fuersa Armada del Pilipinas na Manila.
Si Pasco ya promete dale su todo esfuerzo para compli su obligacion como el nuevo hefe del ACUDS para CMO del Westmincom.
El oficina del CMO amo el ya atende con el iniciativo de relacion de civil-militar del mando.
El mencionao oficina amo tamen el ta atende con el programa de paz, reconciliacion y unificacion del gobierno con el mga grupo inclinado a la paz na Oeste Mindanao.
El ceremonia del entrego de obligacion y responsibilidad ya encabesa si Coronel Emmanuel Cabasan, el Chief of Unified Command Staff de Westmincom. (B. Garcia, photo courtesy of Westmincom PIO)