Un lider del “Abu Sayyaf Group (ASG), quien un experto na hacida de bomba, el ya muri na tirahan contra con mga soldao na mar del provincia de; Basilan, un alto oficial del militar ya anuncia del Domingo.
Si Brigadier General Alvin Luzon, el comandante del 101st Infantry Brigade, ya habla cay si Mudzrimar “Mundi” Sawadjaan ya muri na tirahan contra con mga soldao na mar amediante del Barangay Banah, Tipo-Tipo y Barangay Lahi-Lahi, Tuburan, del Sabado.
Asegun con Luzon, pa salida si Sawadjaan na provincia del Basilan para na Sulu cuando ya columbra conele el mga soldao quien ta conduci patrulla maritima.
“Si Mundi ya sale na Sulu mientras ta finaliza el año pasao para evita con el ofensiva del govierno y su presencia ya puede gole cuando ta principia el año,” ya habla si Luzon.
Si Luzon ya habla cay si Sawadjaan es un lider del ASG na provincia del Sulu.
Asegun con Luzon, si Sawadjaan un notorioso terorista, un experto de bomba, cabesapensante y arcitecto de mga “suicide bombings” y ya comete serie de atrocidad na Sulu.
El mga atrocidad ya comete si Sawadjaan ta inclui el rebentada de bomba na iglesia del Jolo, Sulu del mes de enero año 2019 que ya resulta na muerte del 23 hente y 102 otro el ya iri; rebentada de dos bomba del Agosto 2020 na pueblo del Jolo, Sulu que ya resulta na muerte del 14 hente y irida del 75 otro mga victima; y del mga suicide bombings del mga años ya pasa.
Mientras tando, el govierno de provincia del Basilan ya ayuda facilita el intiero de Sawadjaan siguiendo con el ritual de Muslim de Sabado. (B. Garcia, photo courtesy of 101st Infantry Brigade)