Ya anuncia el govierno local cay no necesita mas pidi permiso para conduci ambos publico y privado asembleya siendo ya menora ya el restriccion contra Covid-19 cay ta esta bajo na alert level 1 el ciudad.
Base na resolucion del national Inter-Agency Task Force for the management of Emerging Infectious Disease (IATF-EID) cay el ciuad del Zamboanga ay esta bajo el Alert Level 1 desde Hulyo uno hasta Hulyo Kinse.
El decision para no mas requiri permiso na conducida del ambos publico y privado asembleya ya bene despues del hunta del Alcalde John Dalipe con mga myembros del local IATF-EID.
Pero asegun con el portavoz del City Hall Belen Sheila Covarrubias cay ay continua implementa el mga reglamento del viaje bajo na orden ejecutivo siente sientos dos pendiente el dalida de un nuevo orden de Dalipe.
El reglamento bajo el existente orden ejecutivo ta stipula cay necesita presenta resulta del examinacion de swab o antigen para con el mga viajero estaba na mga lugar alto el alert level con el ciudad de Zamboanga.
Mga bata menos el deci-ocho anios el edad no necesita mas pone bajo el examinacion de swab o antigen si ta acompanya canila de ila mayores na viaje para aki na ciudad.
Myentrastanto, ta continua siempre enforsa de estricto el uso de masakara y mantenida de personal limpiesa.
El govierno local ta continua apela con mga vivientes para manda clava bakuna para el proteccion contra Covid-19 que ta sirvi pa siempre de amenaso na salud del mga hente. (Bong Garcia)