El National Housing Authority (NHA) ya dale P145,000 ayuda financial con 29 familias afectao na mga separao incidente de incendio que ya ocuri na 12 barrios aqui na ciudad de Zamboanga.
Asegun con Engineer Al-Khwarizmi Indanan, el administrador regional del NHA, el dalida del ayuda financial con mga victima de incendio ya ase posible por medio del Emergency Housing Assistance Program (EHAP) del NHA.
Si Indanan ya habla, el ayuda financial ya distribui con mga destinao recipientes na barrio hall del Camino Nuevo del Viernes.
Asegun con Indanan, cada uno del 29 afectao familias ya recivi P5,000 ayuda financial o total de P145,000 con todo.
El mga recipientes del ayuda amo mga residentes de siguientes lugar: 13 familia de Camino Nuevo, dos de Santa Maria, dos de Mampang, y un familia desde’l mga barrios de Cabatangan, Baliwasan, Dulian Upper Pasonanca, Sta. Barbara, Cacao, Lumbangan, Lunzuran, Putik, y Tugbungan.
Asegun con Indanan, el objetivo del ayuda financial amo para ayuda alivia el situacion del mga afectao familias.
Hunto con Indanan durante el distribucion del ayuda financial si Katrina Reiko Tai, el consultor del administrador general del NHA.
El distribucion del ayuda financial con mga afectao familias ya facilita el Oficina de Desarollo y Bienestar Social del Ciudad. (B. Garcia)