Total de 175 pasajeros y tripulantes de un lancha el ya salva el Naval Forces Western Mindanao (NFWM), por medio del Naval Task Force-61 (NTF-61), na mar del Sulu, el NFWM ya anuncia del Lunes.
Con aquellos ya salva mga personajes del NTF-61 del Sabado na distancia de 2.55 millas nauticas norte-weste del iste isla de Bolod, Sulu, amo maga pasajeros y tripulantes del M/V Queen Shaima, asegun con Rear Admiral Donn Anthony Miraflor, comandante del NFWM.
Asegun con Miraflor ta navega el M/V Queen Shaima para na ciudad de Zamboanga estaba na municipio del Luuk na provincia de Sulu cuando ya man aberiya el makina del lancha.
Asegun con Miraflor, cuando ya recivi sila el noticia sobre el incidente, enseguidas sila ya imbia con el BRP-Florencio Iñigo para ausilla con el M/V Queen Shaima.
Con el 80 del 175 pasajeros ya manda munta na BRP-Florencio Iñigo y el restante 95 ya esta na M/V Queen Shaima que ya hala el varco del fuersa naval.
Asegun con Miraflor cay el BRP-Ivatan que akel tiempo na vicinidad de 2.4 millas nauticas norte-iste del isla de Baluk-Baluk, Hadji Muhtamad, Basilan, ya extende tamen ayuda con el M/V Queen Shaima.
Contodo’l mga pasajeros y tripulantes ya transferi para na BRP-Ivatan cay mas grande este compara con el BRP-Florencio Iñigo.
Si Miraflor ya habla cay con el M/V Queen Shaima ya hila para na pantalan de Ensign Majini del NFWM.
Si Miraflor ya comenda con todo’l mga personajes del mando quien ya ayuda salva con el mga pasajeros y tripulantes del M/V Queen Shama. (B. Garcia, photo courtesy of Naval Task Force-61)