Maga personajes del Naval Forces Western Mindanao (NFWM) ya salva con un Australiano ta man anud abordo na su yate por cuantos hora ya aqui canaton na ciudad de Zamboanga.
Asegun con Lt. Senior Grade Chester Ross Cabaltera, el portavoz del NFWM, cay con Malcolm McIntyre, 57, ya salva maga personanes del Multi-Purpose Attack Craft BA487 maga alas siete sincuenta del Lunes denoche serka na island de Santa Cruz Island, este ciudad.
Asegun con Cabaltera cay con McIntyre ya puede salva cuando ya responde maga personajes del BA487 con el llamada de ayuda desde el yate nombra como el “Spirit of Argao”.
Si Cabaltera ya habla cay si McIntyre ya sale na pantalan de Dampier na Weste Australia del Agosto cuatro y esperansao llega del Lunes, Septiembre sinco, na ciudad de Cebu para visita con su esposa y anak.
Pero porcausa del mal tiempo del Lunes, el yate de McIntyre ya man anud para na isla de Coco, Akbar, Basilan desde’l intendido ruta de suyu.
Por mal suerte, ya perde le control cay ya keda malo el makina del yate y ya palta gasolina. Ya precura si McIntyre compone con el makina del yate, person nuay puede.
Maga personajes del Navy, ya lleba con McIntyre y su yate na Naval Station Romulo Espaldon cuando ya puede sila compone con el makina.
Con McIntyre ya lleba na Camp Navarro General Hospital para el checkyada medical y ya dale conele sustansioso comida. (Bong Garcia, Jr.) (Photo Courtesy of Naval Forces Western Mindanao)
