El Ministerio de Obras Publicas o MPW na Bangsamoro Autonomous Region in Muslim Mindanao (BARMM) ya completa el construccion del un camino para na tianggue o farm-to-market road (FMR) con el objetivo para mejora el vida del mga comunidades rurales na provincia de Sulu, asegun con el militar del Domingo.
Asegun con el 11th Infantry Division (11ID), con el FMR que ya inagura del Viernes, ya construi na Sitio Tuwak, Barangay Bun-Bun, Patikul, Sulu.
El 11ID ya habla, el 1.14-kilometros camino, que ta conecta con el Barangay Bun-Bun para na Barangay Taung, es un crucial proyecto del MPW-BARMM cay esperansao este dale oportunidades vital que significamente hay eleva el estandar del vida y condiction social del populacion local.
Si Major General Ignatius Patrimonio, el comandante del 11ID, quien ya atende con el inaguracion del proyecto, ya enfatiza el importancia del esfuerzos colaborativo para adqueri paz y desarollo na provincia del Sulu.
“El inaguracion de este camino hay dale oportunidad para mejora el estilo del vida y condicion social del mga gentes de Patikul,” si Patrimonio ya habla.
Si Ingeniero Ajan Ajijul del oficina de ingenieria del primer distrito na Sulu, ya descata el continuando asociacion entre el MPWH-BARMM, 11ID, y unidades del gobierno local.
“Ta asegura yo cay el de aton asociacion hay continua con el MPWH-BARMM, comitido came para hace mas proyectos de desrollo que hay beneficia con el comunidades na Sulu,” si Ajijul ya habla.
El nuevo camino esperansao mejora el acceso para na tianggue, ciudado de salud, educacion y otro servicios esencial, fomentando el crecimiento economico y estabilidad na provincia del Sulu. (B. Garcia)