Un motorista el ya aresta y ya confisca P238,000 cantidad de droga ilegal el mga autoridad na provincia del Lanao del Sur, asegun con el policia del Martes.
Asegun con police Colonel Robert Daculan, el director del policia na provincia del Lanao del Sur, con el motorista ya aresta na un checkpoint del Lunes na carretera del Narciso Ramos na Barangay Upper Igabay, Kapatagan.
Nohay mas nombra si Daculan con el motorista con quien ya cogi ta carga 35 gramos de suspechao shabu que tiene el valor de P238,000.
Asegun con Daculan, el mga pulis ya queda curioso cuando ya nota sila con el suspechao ta maneja motorcycle hesitao avanza mientras ta conduci sila checkpoint contra criminalidad na carretera del Narciso Ramos.
El suspechao ya actua suspechoso y nohay puede presenta documento de registro del su motorciclo cuando ya confronta conele el mga pulis.
El suspechao ya aparece tambien malingasa y incoperativo.
Asegun con Daculan, despues del cuantos pregunta, el suspechoso motorista voluntariamente ya admiti cay ta lleva le droga ilegal.
Si Daculan ya habla, ya recubri na posesion del motorista 35 gramos de suspechao shabu enpaquetao na dos termosellada sobrecitos plastico con el valor de P238.000 y un motorciclo.
Con el arestao motorista ya lleva na quartel del policia del municipio de Kapatagan en preparacion para el plantada del caso contra conele por violacion del Ley integral de drogas peligrosas de 2002. (B. Garcia)