El “Ministry of Health-Bangsamoro Autonomous Region in Muslim Mindanao (MOH-BARMM) hay implementa P40 millones valor de proyecto na ciudad del Lamitan provincia de Basilan.
Asegun con el MOH-BARMM, el proyecto ay inclui el construccion de edificio del “Out-Patient Department (OPD)”, edificio de auxillar y sala, compone con el edificio principal, y anchada del departamento de emergencia del “Lamitan District Hospital”.
Asegun con el MOH-BARMM, el objeto del proyecto amo para mejora mas y omenta el capabilidad de servicio de hospital con el publico.
El Lamitan District Hospital, ta servi tamen con mga vivientes del mga sercanos municipio puera con el mga residentes del ciudad de Lamitan.
El Gobernador Jim Hataman-Salliman hunto con Dr. Jackielou Eisma-Castillo, el oficial en-cargao del Lamitan District Hospital y mga representantes del MOH-BARMM, ya encabesa con el ceremonia de innovador o “groundbreaking” del Lunes aga.
El ceremonia ta significa el principio del implementacion del proyecto. (B. Garcia)
