El 11th Infantry Division (ID) del Philippine Army ya activa otro battalion para ase mapuersa el peleya contra con el grupo del Abu Sayyaf na provincia de Sulu.
Si Major General Ignatius Patrimonio, comandante del 11ID y Joint Task Force (JTF)-Sulu, ya encabesa con el activada del 104th Infantry Battalion (IB) del Lunes na Campo Heneral Teodulfo Bautista que ta sirvi quartel del 11ID na Barangay Bus-Bus, Jolo, Sulu.
Si Patrimonio ya habla cay el nuevo batalion ay omenta con el capabilidad del su mando na campanya de paz, seguridad y desarollo del provincia de Sulu.
Si Patrimonio ya designa con Tiniente Coronel Roland Arreola como el primer camandante del nuevo batalion.
Asegun con Arreola un grande honor na su parte para sirvi como el primer comandante de batalion, pero un grade desapio tamen este na su capabilidad.
Sin embargo, si Arreola ya habla cay preparao ele accepta con el gran desapio con todo humildad y con optimismo siendo ay trabaja le hunto con maga competente, eficiente y dependable personajes.
Si Patrimonio ya apela con el maga personajes del nuevo batalion para ase enbuenamente de ila trabajo amediante el maga desapio que ay enfrenta sila na futuro.
El 104IB amo el terser batalion ya activa el 11ID para ayuda na peleya contra con el grupo del Abu Sayyaf.
El primer dos batalion que ya activa el 11ID amo el 100IB y 101IB. (Bong Garcia, Jr.) (Photo Courtesy of 11th Infantry Division)