Dos mga “high-value targets (HVTs)” el ya aresta mientras P3.4 millon valor de droga ilegal el ya confisca el mga autoridad na un campaña contra droga na provincial del Lanao del Sur.
Otro dos suspechao el ya puede escapa durante el campaña contra droga ilegal, el Philippine Drug Enforcement Agency-Bangsamoro Autonomous Region in Muslim Mindanao (PDEA-BARMM) ya habla del Viernes.
El PDEA-BARMM ya habla, con el dos arestao suspechao conosidos como canda Minsuary Abinal y si Ansary Gulman ya aresta na un “buy-bust operation” maga alas 3:35 del Jueves tarde na Barangay Poblacion, ciudad de Marawi, Lanao del Sur.
Con el dos ya puede escapa ya nombra lang el PDEA-BARMM como un tal Paumbaya y un tal Sadat.
Asegun con el PDEA-BARMM ya puede confisca na posesion del dos arestao suspechao 500 gramos de suspechao shabu que tiene el valor de P3.4 million, markao sen, un celpon, un vehiculo, un motorsiclo, un portamoneda y mga tarjetas de identificacion.
Canda Paumbaya y Sadat ya puede escapa muntando na un vehiculo que ya puede recubri mga autoridad despues que ya abandona sila con el menciona vehiculo.
Asegun con el PDEA-BARMM, el dos arestao suspechao detenido na facilidad de ila en preparacion para el plantada del formal asunto contra canila hasta con de ila dos uban quien ya puede escapa.
Con el mga suspechao ya aresta mga operativas del PDEA-BARMM con el suporta del policia y militar. (B. Garcia, photo courtesy of PDEA-BARMM Facebook page)