El militar, con el suporta de logistico desde’l gobierno del Zamboanga del Norte, ta hace proyecto de componida y abrida de camino que eventualmente ay conecta con el provincia del Zamboanga del Sur y Zamboanga Sibugay, por medio del municipio de Godod.
Asegun con el 102nd Infantry Brigade, con el implementacion del proyecto ta encabesa el 547th Engineering Battalion y 97th Infantry Battalion.
El proyecto ta inclui el rahabilitacion del camino desde Sitio Makinaryas, Barangay Bunawan, Godod, Zamboanga del Norte para na Barangay San Pedro na mismo municipio.
El decision para prioritiza con el proyecto amo por causa del significania historia cay pirmi antes ta anda mga rebelde New People’s Army na mencionao lugar.
Con el buncada del 102nd Infantry Brigade con del grupo del NPA que ta opera na region, el esfuerzo aura ya cambia para sustene el ganancia y atende con el asuntos que ya exploita el mga NPA como el probresa, alto precio de producto y abandonamiento del gobierno.
Asegun con el 102nd Infantry Brigade, el proyecto de camino ay dale buen oportunidad con el mga constituentes de Godod por causa ay conecta este con el sercano municipio de Kabasalan na Zamboanga Sibugay.
El proyecto de camino ay mejora con el accesibilidad y fomenta con el desarollo de economia entre el municipio de Godod y Kabasalan.
(B. Garcia, photo courtesy by 97IB)
