El Departamento de Trabajo y Empleyo (DOLE) ya distribuji P1.19 milyones valor de arimienta de busca lavida con 40 mga mayores del mga salvao jovencito obreros aqui na ciudad de Zamboanga.
Asegun con Engineer Wesley Tan, el hefe del technical support and services division del DOLE, cay el mga arimienta de lavida ya distribuji con el mga beneficiaryo na “covered court” del Barangay Canelar del Huwebes.
El mga beneficiaryo del programa ya recivi cariton, galamiton de cusina, gallon, aros, y tarpolin y otros pa.
Asegun con Tan cay el mga beneficiaryo amo el segundo grupo que ya recivi arimienta de busca lavida desde con el agencia.
Si Tan ya habla cay el distribucion del mga arimienta amo parte del campanya del DOLE para dale con mga mayores manera de busca lavida y para hinde mas trabaja pa de ila mga anak.
El mga beneficiaryo amo mga vivientes del mga barangays de Cabatangan, Canelar, Campo Islam, Pasonanca, Rio Hondo, Recodo, Sinunuc, Sta. Maria, Samto Niño, Calarian, Zone II and Zone III, Boalan, Kasanyangan, Talon-Talon, Mercedes, Sangali, Pasobolong, and Tugbungan.
Myentrastanto, el alcalde John Dalipe ya expresa su gratitud con el DOLE por el initiativo que ta sirvi parte del campanya del govierno para proteje con el derecho y buen estar del mga bata. (B. Garcia, photo courtesy of Mayor John Dalipe page)