El municipio de Maluso na provincia de Basilan ya celebra con el dia de los heroes nacionales por medio de declarar con el pueblo librao ya na amenaso y influencia del grupo Abu Sayyaf, o ASG, asegun con el militar del Martes.
Asegun con el 101st Infantry Brigade (101Bde), el declaracion ya hace durante un programa del Lunes na sala municipal del Maluso na Barangay Townsite del municipio.
“Este declaracion ta marca otro significante acomplicimiento na viaje del provincia de Basilan para logra paz duradera y seguridad, como el Maluso hay queda el aka-11 localidad na Basilan para esta librao na amenaso y influencia del ASG,” el 101Bde ya habla na un declaracion.
Na su comentario de bienvenida, el Alcalde Hani Bud del Maluso ya expresa su gratitud con todo quien ya ase de ila parte para logra el acomplicimiento.
Ya entrega tamen si Bud con Brigaider General Alvin Luzon, comandante del 101Bde, 10 rendido rifles Garand durante del ceremonia.
“El acto de rendida del mga armas de fuego hinde lang ta marca el descanso del comunidad de su pasao problematico pero su esperanza colectivo para el pacifico y segurao futuro,” el 101Bde ya habla.
Si Luzon ya reconoce con el esfuerzo colectivo del militar, policia, unidades del gobierno local y agencias, organizaciones no gubernamental, o NGO, y del comunidad para adqueri el significante acomplicimiento.
Ya enfatiza si Luzon cay el declaracion del Maluso como un municipio librao desde’l ASG, es un testamento de corage y determinacion del mga gente para reclama de ila casa desde’l poder del extemismo radical. (B. Garcia)