El mga soldao del 1st Mechanized Infantry Battalion (1MIB) y policia ya aresta 12 personas ta lleva mga armas de fuego sin licensia na provincia del Maguindanao del Sur, asegun con el militar del Martes.
Asegun con Tiniente Coronel Roberto Betita, el comandante del 1MIB, con el mga armao personas ya aresta pasada alas 11 del Lunes denoche na Barangay Pandag, municipio de Pandag, provincia de Maguindanao del Sur.
Asegun con Betita, antes que ya aresta con el 12 armao personas, ya recivi sila informacion sobre el presencia del mga armao gentes ta esconde na un abandonao edeficio na Barangay Pandag.
Si Betita ya habla, enseguidas sila y el policia ya conduci operacion cuando ya confirma sila el presencia del mga armao gentes na Barangay Pandag que ya resulta na aresto del 12 personas y confiscacion de siete armas de fuego de alta calibre.
El mga confiscao armas de fuego ta inclui dos rifle M-16 y sinco calibre .45 pistola con mga bala. Ya confisca tamen canila un corta pluma y mga cosas personal.
El mga arestao personas y el mga confiscao armas de fuego ya entrega na policia del municipio de Pandag para el propio disposicion.
Si Brigadier General Andre Santos, el comandante del 1st Mechanized Infantry Brigade, ya rindi gracias con el mga residentes quien enseguidas ya reporta que ya resulta na prevencion del mal plano del mga armao personas.
Asegun con Santos, grande el responsibilidad del mga vivientes na mantencion de orden, especialmente na oportuno reportada del semehante incidentes.
Si Major General Antonio Nafarrete, comandante del 6th Infantry Division, ta continua hace el llamada con el mga vivientes quien hinde autorizao carga armas para inmedietamente rendi de ila pusil na mga autoridad. (B. Garcia)