Un 5.4 magnitud temblor origin de tectonico el ya hace uyug con muchas partes del Zamboanga Peninsula mga alas 11:41 del Jueves aga, asegun con el Philippine Institute of Volcanology and Seismology (Phivolcs).
Si Allan Rommel Labayog, el Phivolcs-Zamboanga City science research analyst, ya habla el epicentro del temblor es na municipio de Siocon, Zamboanga del Norte que tiene el distancia de 157 kilometros oeste del ciudad de Zamboanga.
El operaciones na mga oficinas como el City Hall, incluido mga escuelas el temporariamente ya suspende cay tiene que evacua el mga ocupantes para na un librao lugar.
Despues del temblor, el mga administraciones del diferentes escuelas—colegio, segundaria, y elementaria—ya manda bolbe con el de ila mga estudiantes.
Asegun con el City Disaster Risk Reduction and Management Office, intensidad cuatro el ya sinti na ciudad de Zamboanga.
Si Doctor Elmeir Apolinario, el jefe del CDRRMO, ya apela con el mga vivientes para esta alerto y vigilante.
Ya apela si Apolinario cay si puede sila nota algun destroso ng mga edeficios, camino, o infraestructura para inmedietamente reporta na su oficina.
Ya conseja si Apolinario con mga vivientes na ciudad pata esta vigilante y bisia con el mga aviso desde’l Phivolcs y otro agencies concierne siendo esperansao tene replica base con el informacion de temblor numeri 1 ya dale el Phivolcs. (B. Garcia)