El Office of the City Agriculturist (OCA) ya proporciona semilla de tilapia conel maga escujido beneficiarios agricultores na Sitio Mangga Bolong, Barrio de Bolong en este cuidad, es parte na esfuerzos na produccion de comida y suporta para sostene el buscada lavida.
Mientras el distribucion ya encavesa pormedio del Research Experiment Demonstration Services Division (REDSD) na socio del Agricultural Field Office 4 Distrito de Manicahan.
Antes recivi conel maga semilla, el maga agricultores ya participa y ya atende un session de entreno aserca conel sellama propio tilapia farming. El orentacion cubrido como el fish feeding, water management, disease control, y harvesting techniques para ayuda asigura cay sale exitoso el fish production.
Despues ya examina el maga Project Personnel el qualidad del agua na deposito para el medidas puede sabe el nitrate levels, ammonia y confirma si el lugar justo para cuida tilapia.
Ademas, el initiativa ta dale coraje conel agricultores para man integrate fish culture donde ta existi diila farming activities pormedio usada del maga water reservoir ya established bajo na DSWD Lawa at Binhi Program.
Omentos pa del maga funcionarios de agricultura, que expecta el mentionao programa ay grande ayuda na mejoramiento na securidad de comida, proporcionando conel familia con adicional fuente de alimento y crear la oportunidad economico pormedio conel aquaculture. (Keith Luna)