Grande el creyencia del pulisiya local cay “love triangle” el motivo na matansa del un 30 años mujer na Barangay Tetuan, aqui na ciudad de Zamboanga.
Pero nohay mas elabora el pulisiya puera lang que ta investiga pa enbuenamente con el incidente para sabe si quien el echor para el su posible aresto na mas temprano tiempo.
Si Police Major Sonny Boy Perez, el hefe del Zamboanga City Police Station 6 (ZCPS6), ya habla cay con el victima ya conose como si Sheena Tiago Celeste, un residente del Guadalupe Drive, Barangay Tetuan, este ciudad.
Asgun con Perez, con Celeste ya tira el un desconosido armao persoana maga alas 8:10 del noche del Lunes na Guadalupe Drive.
Base na inicial investigation, asegun con Perez, cay derepente lang ya abuya el suspechao y ya tira con Celeste na atras del cabesa cuando ya sale apuera del su apartment el victima.
El suspechao ya istindi para na carretera nacional despues que ya tumba y ya muri si Celeste con un tupada de bala na su cabesa.
El mga pulis ya encontra un capsula del calibre .45 pistola na lugar del crimen. (B. Garcia, photo Courtesy of ZCPS6)