Un lider del un grupo de pandilla criminal que envuelto na secuestro para pedir rescate el voluntriamente ya rendi na provincia del Zamboanga del Norte, asegun con el policia del Lunes.
El mando regional del policia nohay mas nombra con el rendidor lider de pandilla criminal puera lang de habla’r el persona un hombre quien tiene el edad de 50 años.
Asegun con el policia, el rendidor es un lider de pandilla criminal de Lumarang, de quien grupo envuelto na secuestro para pedir rescate o kidnap-for-ransom.
Asegun con el policia, el lider de pandilla criminal ya rendi mga alas 4:30 del Sabado tarde na sala de sesiones de consejo del municipio de Sirawai, Zamboana del Norte.
Asegun con el policia, el rendidor tiene de antes orden de aresto por el crimen de secuestro y detencion ilegal grave, pero ya desestimo con el caso cay nohay interes persigui el mga reclamantes.
El rendidor nombrao tamen antes como el numero uno persona mas buscada del mando regional del policia para el año 2022-2023.
Durante el rendida del lider de pandilla criminal, ya dale con ele ayuda de busca lavida como suporta na su reintegracion na comunidad.
Con el rendidor lider ya larga despues que ya completa su necesario documentos, asegurando cay na buen condicion mental y pisical ele. (B. Garcia)