Ya rindi el un 15 años myembro del “ISIS-inspired Dawlah Islamiya-Maute Group (DI-MG) con mga tropa del 51st Infantry Battalion (IB) del Sabado alla na municipio del Madalum, Lanao del Sur.
Na mismo tiempo, el jovencito myembro del DI-MG ya entrega un riple M-14 cuando ya rindi le.
El 103rd Infantry Brigade ya nombra lang con el jovencito quien ya rindi como si Taimiya, un residente del Barangay Lininding, Piagapo, Lanao del Sur.
El rindida de Taimiya ya ase possible por medio del ayuda del mga vivientes quien activo na dalida de informacion con mga otoridad sobre el presencia del mga myembros de DI-MG na de ila comunidad.
Asegun con Taimiya cay ya convinsi conele para entra na grupo del DI-MG del año 2019 na Sitio Naga, Barangay Tamporong, Madalum, Lanao del Sur cuando 11 años pa lang su edad.
Durante aquel tiempo, asegun con Taimiya cay ya forsa con ele para participa na mga tirahan encontra con mga soldao.
Asegun con Taimiya cay ya decidi le rindi por causa del dificultad ta experiensya ele cay pirmi lang sila ta core para evita con el ofensiva sin descanso del fuersa military.
Si Taimiya bajo ahora na custodiya y interogacion del 51IB y na mismo tiempo para ase el proceso para pone conele bajo na Enhanced Comprehensive Local Integration Program (E-CLIP) que ya man “institute” el govierno provincial del Lanao del Sur.
Si Brigadier General Yegor Rey Barroquillo Jr. el comandante del 103rd Infantry Brigade ya comenda con el mga tropa del 51IB por el de ila buen acomplisimiento.
Na mismo tiempo, si Barroquillo ya ase llamada con el restante myembros del DI-MG para rindi y toma ventaja con el E-CLIP del govierno. (B. Garcia, photo courtesy of 51st Infantry Battalion)
