Un myembro del “4H Club” de Barangay Sinunuc, este ciudad, el recientamente ya completa 11 meses estudio na produccion de agricultura bajo el “Filipino Young Farmers Internship Program (FYFIP)” del “Agri Training Institute” na Taiwan.
Si Alsol Ramirez, un activo jovencito agricultor, recientamente ya bolbe aqui na ciudad de Zamboanga y conele ya presenta durante el ceremonia de la bandera del Lunes aga enfrente del City Hall.
Ya presenta tamen con otro tres mga jovencito agricultor quien esperansao esta bajo semehante estudio como el cosa ya estudia si Ramirez na Taiwan este mes de Hulyo.
Sila amo canda Rica Amor Atilano de Barangay Curuan, Shiela Rose Gaudioso de Lumayang y Ace Ferrer de Pasobolong.
Asegun con Arben Magdugo, el interino hefe del Oficina de Agricultura del Ciudad, cay el 11 meses estudio amo para tener abilidad y sabiduria por medio del cambiada de moderno tecnica, estrategias de vendida y mecanismo, manejada de cooperativa y mejoras de competencias, disiplina y valores.
El “FYFIP” na Taiwan amo un program de camaraderia entre el “Manila Economic and Cultural Office (MECO)” y el “Taipei Economic and Cultural Office (TECO)” para mejora el existente relacion por medio de implementar programas de internos para con mga qualificao jovencito Filipino agricultor.
El “4H Club” amo el principal organisacion bajo el Departamento de Agricultura, que ta facilita el Oficina del Agrucltura del Ciudad, para mejora con el sector de agricultura y fescariya por medio del activo participacion del los jovenes. (B. Garcia) (Photo courtesy of City Government PIO)