Si Gobernador Victor Yu del Zamboanga del Sur ya dale P1 million premio con el informante quien ya dale informacion vital que ya resulta na muerte de un infamoso lider del New People’s Army (NPA) en aquel provincia.
Asegun con el 53rd Infantry Battalion (IB), si Yu, como el cabeza del comite del “Zamboanga del Sur Provincial Task Force to End Local Communist Armed Conflict (PTF-ELCAC)”, personalmente ya dale el premio de P1 millon con el informante na un simple ceremonia del Viernes.
El 53IB nohay mas nombra con el informante civilian por rason de seguridad.
Asegun con el 53IB, el informante civilian ya servi de un importante parte na dalida del informacion vital que ya lleva na buen resulta del operacion resultando na neutralizacion del un alto ranggo lider del NPA.
El lider del NPA, si Aprecia Alvarez Rosete alias Ka Bambam, ya muri na un tirahan contra con mga soldao na Barangay Malagalad, Dumingag, Zamboanga del Sur, del Febrero 27.
El tirahan ya principia cuando ya columbra mga soldao con un grupo del rebelde NPA mientras ta conduci sila operacion de combate na Barangay Malagalad.
Si Rosete amo el secretarya del Western Mindanao Regional Party Committee del NPA.
Si Yu ya expresa su profundo gratitude con su mga constituentes, empatizando el de ila invaluable contribucion de salvaguardada de paz y istabilidad del region. (B. Garcia, photo courtesy of 53IB)