El mga autoridad ya confisca P1.3 millon valor de droga ilegal cuando ya aresta sila con un high-value target (HVT) persona na un operacion contra droga na Bangsamoro Autonomous Region in Muslim Mindanao (BARMM), asegun con el Philippine Drug Enforcement Agency (PDEA) del Jueves.
El PDEA-BARMM ya nombra con el arestao HVT suspechao como si Najer Arumpac, conocido tamen como si Supremo, 26 años el edad y residente de Barangay Calaan, Buldon, Maguindanao del Sur y Barangay Emie Punod, ciudad de Marawi, Lanao del Sur.
Asegun con el PDEA-BARMM, con Arumpac ya aresta na un operacion de compra busto na Sitio Jose Lim, Barangay Poblacion 5, ciudad de Cotabato, BARMM, del Miercoles.
El PDEA-BARMM ya habla, ya confisca na posesion de Arumpac 200 gramos de suspechao shabu enpaquetao na dos transparente sobrecitos plastico que tiene el valor de P1,360,000, dinero de compra busto, un celpon, un portamoneda, y un tarjeta de identificacion.
Asegun con el PDEA-BARMM, si Arumpac ta distrui droga ilegal na mga municipios na provincia del Lanao del Sur hasta na ciudad de Cotabato.
Si Arumpac detenido ahora na carcel del PDEA-BARMM esperando procidimiento del escueta por violacion del Ley integral de drogas peligrosas de 2002. (B. Garcia)