Un “High-Value Individual (HVI)” el ya aresta myentras valor de P340,000 droga prohibido el ya confisca mga otoridad na un campanya contra droga ilegal na Barangay Zambowood, aqui na ciudad de Zamboanga.
Si Police Major Julius Dao-an, el hefe interino del Zamboanga City Police Station 5 (ZCPS5), ya habla cay con el arestao suspechao ya conose como si Jakazar Manialas, 21 años el edad y residente del Sitio Tong Mateo, Barangay Taluksangay, este ciudad.
Si Dao-an ya habla con Manialas ya aresta na un “buy-bust operation” na Zone 5, Barangay Zambowood, este ciudad mga alas 5:31 del Biyernes tarde.
Asegun con Dao-an ya puede recubri na posesion de Manialas 50 gramos de suspechao shabu con el valor de P340,000, un pakete de seco ojas de marijuana, 60 pedaso de P1,000 “doodle money” y un verdadero P500 markao sen y un sling bag.
Si Dao-an ya habla cay bajo ahora na custodiya del ZCPS5 si Manialas en preparacion para el plantada del formal asunto encontra conele. (B. Garcia, photo courtesy of ZCPS5)