Ya confisca el Guardia Costera de Filipinas (Philippine Coast Guard), alegao contrabando cigarrillos que estimao cantidad valor de ₱15.15 milliones de pesos, na linea costera del Barrio Cawit, Zamboanga City.
Na report ta aparece, cay mientras ta conduci maritime surveillance operation el PCG maga ala una del madrogada, donde ya puede sila columbra un Jungkong-type pump boat que ta suspecha ta transporta este elemento de contrabando.
Despues, sinti el presencia del autoridad, inmediatamente ya entabla el pump boat na aplaya, es resulta el operativa ya endereza na lugar que ta suspecha sila que alla descarga el contrabando, donde ya puede columbra el autoridad maga cajon que ta contene diferente contrabando cigarrillo.
Total de noventa y ocho (98) master cases y diecisiete (17) reams de varios brand de cigarillos, estimao cantidad valor de ₱15.15 million de pesos.
El confiscao contrabando, ya lleva enseguidas na Coast Guard Station Zamboanga, y despues entrega na Bureau of Customs–Port of Zamboanga para na propio disposicion en conformidad na leyes que ta existi.
Asegun, ya sale exitoso el operacion por medio na combinao fuerza del Coast Guard Station Zamboanga, Coast Guard Intelligence Group–Southwestern Mindanao, Coast Guard Intelligence Unit–Zamboanga, y Coast Guard Sub-Station Cawit.
Omentos pa del Guardia Costera de Filipinas, cay ta demostra el operacion el sin descanso campaña contra contrabando y el intensificao esfuerzos de seguridad maritima para haber proteje el economico del pais y interes nacional. (Keith Luna)