El Gobernador del Basilan Hadjiman Hataman-Salliman ya apela con el mga nuevo Board of Directors (BOD) del Basilan Electric Cooperative (Baselco) para ase de fronto el compre del 18.5-megawatt electricidad y el rehabilitacion del terser liña transmision del Baselco.
Si Salliman ya ase el apelo cuando el mga nuevo Board of Directors que ta encabesa si Board President Ammalun Salahuddin ya hace visita de cortesia conele na su oficina del Miercoles.
Con el mga nuevo miembros del Board of Directors ya eleji del otros mes.
El mga nuevo Baselco Board members ta representa con el nueve distrito del Basilan. Sila amo el mga siguientes: Annur Lepai de Lantawan, Kammad Totong de Tipo-Tipo, Nurhadee Atal de Sumisip, Ammalun Salahuddin de Isabela East, Abdulhan Mohammad de Maluso, y si Troy Dioneda de Lamitan West.
El Departamento de Financia ya aprova con el pedido de Salliman para aloca P500-million para el proyectos que hay hace con el Baselco como un piloto en eificiencia na coleccion de ingreso.
Asegun con Salliman, el momento hay principia el proyecto, el gobierno provincial hay ayuda na implementacion, sabiendo bien vital el electricidad de desarollo del economia del Basilan.
Mientras tanto, si Salliman ya pidi con el mga nuevo BOD de Baselco para mantene con el cooperativa de electricidad apolitico y esforza que no jala con el cooperativa para na feo dolor del politica.
El mga lideres political del Basilan ta principia ya este mga tiempo organiza de ila mga suportadores en preparacion para el eleccion na otro año. (B. Garcia)