Si Brigadier General Alvin Luzon, el comandante del 101st Infantry Brigade, ya comenda le con el mga milicianos por el de ila inquebrantable dedicacion y crucial parte na mantencion del paz y orden na provincia del Basilan.
Si Luzon ya hace el comendacion cuando ya visita le con el mga milicianos del Miercoles na base de patrulla na Barangay Lanote, ciudad de Isabela, el capital del provincia de Basilan.
Durante su visitada, ya encabesa tamen si Luzon el distribucion del mga esencial necesidades del mga milicianos con el objetivo para mejora efectivamente de ila el operacion y proteccion.
El mga esecencial necesidades que ya distribui si Luzon ta inclui mga saco de arroz, sombrero, mga medicina y otros pa.
Durante su dialogo con mga milicianos, si Luzon ya dale importancia del base de patrulla na Barangay Lanote y ya acentua el necesidad para prioritiza de ila seguridad mientras ta hace de ila mandato.
Durante el visitada de Luzon na Lanote, ya acompania conele si Coronel Frederick Sales, el diputado comandante del 101st Infantry Brigade, y otros pa mga oficiales del militar base na provincia del Basilan.
De ila presencia ta reafirma el unido suporta desde’l liderato del brigade y de ila colectivo comprometido na seguridad local. (B. Garcia)