El Fuerza Naval del Philipinas ya transferi con el BRP-Deluana (PG905) desde’l mando del Naval Forces Western Mindanao para na Naval Forces West.
Este ya vene despues que el PG905 que bajo mando del Comander Alvin De Lina, ya servi bajo’l jurisdiccion de NFWM por mas de un año.
Si Rear Admiral Francisco Tagamolila, Jr., el comandante del NFWM, ya encabesa con el ceremonia de despidida para del PG905 que ya hace del Viernes na pantalan del Ensign Majini del Estacion Naval Romulo Espaldon na ciudad de Zamboanga.
El ceremonia ta marka el transferida del control operacional del PG905 desde NFWM para na lugar de Naval Forces West.
El ceremonia ta servi tamen como un reconocimiento del significante contribucion y exitoso mision durante el despliegue del PG905 na NFWM por mas de un año.
Durante el ceremonia, ya dale premio de medalla de la cruz de bronce con De Luna como un reconocimiento del su servicio na NFWM.
El PG905 amo el aca-cuatro barco del Acero-class patrol gunboat bajo el Littoral Combat Forces del Philippine Fleet.
Con el PG905 ya comisiona del May 26, 2023 durante el 125 aniversario del Philippine Navy. (B. Garcia)