El BRP-Ivatan (LC298) que bajo control operativo del Naval Forces Western Mindanao (NFWM) ya inicia cambio na liderato del Jueves, asegun con el NFWM del Sabado.
El ceremonia del cambio de liderato ya hace na casa club de oficiales del Estacion Naval Romulo Espaldon y ya presidia si Capitan Hilarion Cesista, el diputado comandante del operaciones de flota y el comandante del Naval Task Force-61 (NTF-61).
Na transicion de liderato, si Commander Gelvisryan Añonuevo, ya entrega el mando del LC298 con Lieutenant Commander Raymond Sarmiento.
Durante el ceremonia, ya dale premio de medalla de la cruz de bronce con Añonuevo por su exepcional actuacion durante operaciones de seguridad maritima dentro na jurisdiccion del NFWM.
Si Rear Admiral Francisco Tagamolila, el comandante del NFWM y el huesped de honor del ceremonia, ya comenda con Añonuevo por su contibuciones na acomplisimiento del mision del NFWM.
Ya ase acorda si Tagamolila con el oficiales del fuerza naval quien ta aspira queda capitan de barco cay un grande responsibilidad para guia un barco.
Asegun con el NFWM, el diseño del LC298 amo para transporta mga soldao y materiales na canto’y aplaya sin el necesidad de un pantalan y semehante facilidad.
Presentamente, con el LC298 ta usa para transporta mga soldao entre mga isla y ta usa na operaciones de socorro en casos de desastre. (B. Garcia)