Ya muri el un mymebro del “Citizen Armed Force Geographical Unit (CAFGU)” na un incidente de tiro na municipio del Liloy, Zamboanga del Norte.
Si Police Colonel Glenn Dulawan, el director del pulisiya na provincia del Zamboanga del Norte, ya nombra con el victima como si Sabre Cabato, 38 años el edad, y residente de Barangay Limbonga, Godod.
Si Dulawan ya habla cay el incidente ya ocuri mga alas 4:15 del tarde del Lunes, na Barangay Dela Paz, Liloy, Zamboanga del Norte.
Asegun con Dulawan, cay base na investigacion, si Cabato y el suspechao, nombrao como si Vincent Refugio, 39 años el edad, ya tene un caliente argumento antes del incidente.
Amediante del caliente argumento, si Dulawan ya habla cay ya arangka pusil si Refugio na su sintura y ya tira con Cabato y ya tupa na pecho del victima.
Asegun cay maskin irido ya si Cabato, ya puede pa ele camina pa apuera del casa de Refugio, pero derepente lang ya tumba el victima.
El suspechao ya escapa despues del incidente y ta ase conele enbuscada ahora el pulisiya.
El mga pulis quien ya responde con el incidente ya lleba con Cabato na ospital pero el doctor ya declara muerto con el victima. (B. Garcia)