Un estudiante el ya muri mientras otro uno el ya heri na un incidente de tiroteo na un barangay na un isla del ciudad de Isabela, el capital del provincia del Basilan, del Domingo, el primer dia del implementacion del prohibicion de armas, o election gun ban, na entero pais.
Si Police Lieutenant Colonel Raymond Sanson, el nuevo instolao jefe del policia na ciudad de Isabela, ya nombra con el facilidad como si Eddie Sauragal, 21 años el edad.
Asegun con Sanson, el herido victima amo si Hamudi Mohammad, 18 años el edad, el compañero de clase y amigo de Sauragal.
Asegun con Sanson, el incidente ya socede mga alas 10 del Domingo denoche na Purok 2, Barangay Tampalan, island de Malamawi, ciudad de Isabela.
Base na investigacion, ambos si Sauragal y Mohammad ta camina na Purok 2, Barangay Tampalan, cuando benia el un desconocido armao persona ya tira canila dos.
Si Sanson ya habla, el posible motivos del incidente es agravio personal o puede tamen relatao na actividades de droga ilegal.
El incidente amo el primero na ciudad de Isabela durante del periodo de eleccion. (B. Garcia)