33.8 C
Manila
Friday, March 29, 2024

Zamboanga: Estudiante de Basilan muerto na incidente de tiro

- Advertisement -

Ya muri el un estudiante de un colegio publico na un incidente de tiro ayer medio dia na ciudad de Isabela, el ciudad capital del provincia de Basilan.

El pulisiya del ciudad de Isabela ya nombra con el victima como si Umaer Atta, veinte dos años el edad, y nativo del municipio de Hadji Muhtammad, Basilan.

Asegun con el pulis cay el incidente ya ocuri cuantos minutos despues de alas dose del miyercoles medio dia na Salain Drive, Barangay Sumagdang, ciudad de Isabela.

Base na investigacion cay ta maneja motor si Atta cuando ya tira conele el uno del dos hente muntao na otro motorcyclo que aquel tiempo ta sigi na atras del victima.

Asegun con el pulisiya ya muri si Atta despues que ya tupa conele el tiro na cabesa.

El dos suspechao ya escapa para na direccion del municipio de Lantawan.

El pulisiya del ciudad de Isabela ta continua el investigacion sobre el incidente para determina si quien el maga suspechao y si cosa el motivo del incidente. (B. Garcia, photo courtesy of Kilo India)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -