Zamboanga: DTI, DSWD ya dale ayuda financial con mga vendedor de aros

0
8

El Departamento de Comercio y Industriya (DTI) y el Departamento de Bienestar Social y Desarollo (DSWD) ya dale del Huwebes ayuda financial con 11 mga registrao vendedor de aros aqui na ciudad quien afectao con el implementacion del Orden Ejecutivo numero 39.

Cada un beneficiario ya recivi P15,000 bajo el “Sustainable Livelihood Program-Economic Relief Subsidy (SLP-ERS) del DSWD.

Base na lista del mga beneficiaries, cuatro del mga vendedor de aros na mercao publico de santa cruz y el siete desde’l mercao publico na pueblo.

El Alcalde John Dalipe, por medio del su representante, el Abogao Wendell Sotto, ya rindi gracias con el govierno nacional por el ayuda y ya asegura le con el mga vendedor de aros y consumidores cay el govierno local ay hace todo’l esfuerso para mira con el seguridad de comida que ta necesita el ciudad.

“Bajo na administracion Dalipe, ta continua kita hace todo manera para man ayudahan na todo sector para hace el necesario colaboracion para hace mas suficiente y afordable con el comida aqui na diaton ciudad.” Si Dalipe ya habla na su mensaje.

El Orden Ejecutivo 39 ta limita el precio del hinde bien molido aros na P41 cada kilo y P45 cada kilo para el bien molido aros. (B. Garcia) (Photo Courtesy of John Dalipe FB Page)

LEAVE A REPLY

Please enter your comment!
Please enter your name here