Total de P6.188 millones ayuda financial el ya distribui el gobierno nacional por medio del Departamento de Bienestar Social y Desarollo, o DSWD, con 3,094 miembros de asociacion de propietarios na ciudad de Zamboanga.
El ayuda financial es parte del programa del DSWD nombrao como el Ayuda sa Kapos ang Kita Program (AKAP).
El oficina regional del DSWD ya habla del Lunes, el ayuda financial ya distribui dentro de dos dias prinicipiando del Jueves hasta Viernes.
Asegun con el DSWD, cada uno del 3,094 identificao beneficiarios ya recivi P2,000 ayuda financial o suma total de P6.188 millones.
El distribucion del ayuda ya hace na gimnasio del escuela del Claret.
El mga beneficiarios del ayuda amo mga residentes del mga barangay de Baliwasan, Rio Hondo, San Jose Cawa-Cawa, San Jose Gusu, San Roque, Sta. Catalina, Sto. Niño, Lunzuran, Mampang, Tugbungan, Pasonanca, Sta. Maria, Cabatangan, Zone 1, Zone 2, Zone 3, Zone 4, Sta. Barbara, Talon-Talon, Tetuan, Canelar, Camino Nuevo, Guiwan, Putik, y Camp Islam. (B. Garcia)