Enseguidas ya dale ayuda el Department of Social Welfare and Development (DSWD) con mga vivientes quien afectao na avenida porcausa del mal condicion del tiempo aqui na ciudad de Zamboanga del Sabado.
Asegun con Ivan Eric Salvador, el portavoz del oficina rehyonal del DSWD, cay ya distribuji el agencia 600 cahon de comida y 100 mga cosas de durmida que tiene el valor de P454,894.
Aquellos quien ya recivi ayuda estaba na oficina rehyonal del DSWD amo mga vivientes afectao na avenida na mga barangay de San Jose Gusu, San Roque, y Tumaga.
Presentamente ta esta el mga afectao familya ng mga centro de evacuacion del tres barrio.
El govierno local ya dale tamen ayuda con mga vivientes afectao na avenida.
Mismo si alcalde John Dalipe el ya encabesa con el distribucion de mga comida y mga cosas de durmida como muskitero, manta, y petate.
Puera na San Jose Gusu, San Roque, y Tumaga, tiene tamen mga residentes de Barangay Cabatangan, Putik, y Sta. Maria el ya afecta na avenida.
Ya distribuji tamen medicina el oficina del salud del ciudad contra na enfermedad de leptospirosis que ta puede adqueri por medio del agua de avenida contaminao de miyao de raton.
Myentrastanto, ya tene amen avalance amediante el puerte aguasero na Barangay Capisan del Sabado.
Nohay casa el ya destrosa y nohay tamen quien ya sinti duele durante el avanlance que ya tapa de tirerra porcion del camino del Barangay Capisan.
Enseguidas tamen mga residentes y barangay tanods ya man ayudahan para limpia con el camino de Capisan. (B. Garcia, photo courtesy of DSWD-9)