Total de 713 antes myembros del grupo Abu Sayyaf el ya recivi entreno y ayuda financial desde con el govierno con el objeto para ase subi el de ila estado del vida.
Asegun con Arnel Garcia, el Department of Social Welfare and Development (DSWD) Assistant Secretary for Inclusive-Sustainable Peace and Special Concerns, cay el entreno y dalida de ayuda financial ya ase durante el dos dias “peace caravan” del otro semana na municipio de Maimbung, Sulu.
Antes el distribucion del ayuda, ya chekya anay mga informacion sobre el estado del mga antes myembros del grupo Abu Sayyaf.
El proceso amo para asegura cay el cosa servicio ay dale canila amo el cosa sila necesita para alivia el estado del vida.
Asegun con Garcia cay el mga antes myembros de grupo Abu Sayyaf ya aprovecha mga servicio durante el “caravan” desde el Technical Education and Skills Development Authority (TESDA), Ministry of Agriculture, Fisheries and Agrarian Reform (MAFAR), PhilHealth, Philippine Statistics Authority (PSA), and Integrated Provincial Health Office.
Si Governador Abdusakur Tan del Sulu ya expresa su gratitud por el iniciativa y efuerso del DSWD y military para lleva el servicio del govierno na provincia.
Asegun con Major General Ignatius Patrimonio, el comandante del Joint Task Force (JTF)-Sulu, cay hinde sila cansa de trabajar para lleva el servicio del govierno con mga vivientes de Sulu, incluwido mga estaba myembros del grupo Abu Sayyaf.
El dos dias caravan na Sulu tiene el thema de “Hatid serbisyo para sa pangkapayapaan, tulay para sa nagkakaisang bayan.” (B. Garcia) (Photo Courtesy of DSWD)