Un persona ya muri na campanya contra droga ilegal na municipio de Baliguian provincia del Zamboanga del Norte, asegun con un alto official de pulisya.
Si Coronel Glenn Dulawan, director del pulisiya na provincia del Zamboanga del Norte, ya nombra con el muerto suspechao negociante de droga ilegal como si Faizal Cailo, 57 años el edad.
Asegun con Dulawan cay si Cailo ya muri cuando ya man tirahan ele contra con un pulis maga alas 10:45 del Sabado aga na Barangay Kauswagan, Baliguian.
Asegun con Dulawan cay ya ocuri el tirahan despues que ya aranca su pusil si Cailo y ya tira cuando ya gole ele cay con un pulis el ya ase le transaccion de droga ilegal.
El pulis, quein nohay iri cay ta usa ele “bullet proof vest”, ya tira tamen con Cailo y ya tupa con el suspechao na pecho.
Asegun con Dulawan ya lleba con Cailo na hospital na Siocon pero ya declara con el suspechao muerto el doctor.
Ya puede recubri na posesion de Cailo un calibre .45 pistola con mga bala, un pumpboat, un telephono, un gramo de suspechao shabu con el valor de P6,800, un bag, markao P500, y otro pa mga cosas de droga ilegal. (B. Garcia)