El Departamento de Obras Publica y Carreteras o DPWH ya completa ya con el cubrida de aspalto con el camino na un barrio na provincia del Zamboanga Sibugay como parte de mantenimiento preventivo para hace durable con el camino.
Asegun con el oficina regional del DPWH, el cubrida de aspalto ya hace na camino del Barangay Lutiman, Alicia, Zamboanga Sibugay.
El proyecto del cubrida de aspalto tiene el total largor de 2.368 kilometros de esquinita y sinco metros el anchor.
Asegun con el DPWH, el alocacion de P38.7 millon fondo para el proyecto estaba na General Appropriations Act (GAA) 2023.
El proyecto ya inclui el instolacion de marca termoplastico reflectorizado para el major visual para del mga motorista que ta viaje durante el noche.
Asegun con el DPWH, el completao cubrida de aspalto hay dale mas suave, segurao y mas conviniente expreriencia de viaje con mga residentes local y del mga sercano municipio na region.
Con el proyecto ya implementa el oficina de enginieria del DPWH na del primer distrito del Zamboanga Sibugay. (B. Garcia)