El Departamento de Obras Publicas y Carreteras o DPWH ya anuncia cay ta beneficia ya ahora el comunidades local con el proyectos de control de inundaciones y superposicion de asfalto na ciudad de Lamitan y Isabela na provincia del Basilan.
Asegun con el DPWH del Miercoles, el completao proyecto na ciudad de Lamitan amo el 740-metro estractura de control de inundaciones na ariba parte de rio de Santa Clara.
“Con un estractura para todo clima, el mga residentes del Barangay Santa Clara y comunidades areredor el protejido abora contra el adverso efecto del desbordamiento de agua,” ya habla si Ingeniera Cayamombao Dia, el director regional del DPWH.
Ya construi na valor de P55 millones, el proyecto tiene el caracteristicas de mamposteria de piedra y escombros para preveni el erosion de tierra y estabilizao abajada bajo filtracion.
Asegun con Dia, ya completa tamen el DPWH con el proyecto de superposicion de asfalto na 1.6-kilometro seccion del camino circunferencial na ciudad de Isabela como un mantenimiento preventivo.
Con el mejorao condicion del camino, tiene 4,000 residentes na Barangay Cabunbata hay beneficia con el mas suave entregada de mercancias y mas facil acceso na servicios basicos.
“El mga motorista desde’l ciudad ta experiencia ahora segurao, lijero y mas conviniente viaje na distrito del oeste parte del provincia insular,” ya habla si Dia.
Costando P37.7 millones, el otro trabaho ta inclui el instolacion del farola solar y reflectorizado señales na camino como caracteristicas de seguridad.
Asegun con Dia, ambos proyectos el ya implementa el Oficina de Ingeniería del de DPWH na Distrito del Ciudad de Isabela. (B. Garcia)